Ramil Şeydayevin Azərbaycan futbol yığmasına getməsi axmaqlıq idi.

Axar.az xəbər verir ki, bu sözləri “Exo Moskva” radiosunda çıxışı zamanı rusiyalı idman jurnalisti və şərhçi Vasili Utkin işlədib.

“Hazırda “Zenit” futbol klubunda oynamayan yetirmələrdən mükəmməl komanda qurmaq olardı. Yolu “Zenit”dən keçən, ya da onun yetirməsi olanlar premyer liqanın fərqli klublarında oynayırlar. Məsələ ondadır ki, “Zenit” öz resurslarına diqqət yetirmir. Biz bunu ən fərqli səviyyələrdə görürük. Buna misal kimi “Zenit 2”-nin baş məşqçiliyindən Aleksandr Qorşkovun göndərilməsi göstərilə bilər.

Əslən azərbaycanlı olan mükəmməl adamla bağlı vəziyyəti xatırlayın. O, Azərbaycan vətəndaşlığını qəbul etdi, Türkiyədə oynamağa cəhd etdi. Onun adını unutmuşam (sonradan o adı yadına salır və onun Ramil Şeydayev olduğunu deyir – red.). O, gözəl mərkəz hücumçusu idi. Doğrudur, onun Azərbaycanın xeyrinə oynamağı seçməsi və Türkiyəyə getmək qərarı da axmaqlıq idi. O, “Zenit”də qalsa idi, ona qarşı hansısa maraq göstəriləcəkdi. Məncə, bu olanların hamısı qəribədir”, – deyə o bildirib.

Qeyd edək ki, Şeydayev Azərbaycan vətəndaşlığını 2016-cı ildə alıb. O, bundan öncə Rusiyanın 17 və 19 yaşlılardan ibarət futbol yığmalarında oynayıb. Futbolçu 17 yaşlılardan ibarət yığma ilə birgə Avropa çempionu da olub.

O, “Zenit”lə bərabər, “Trabzonspor”, “Jilin” komandalarında oynadıqdan sonra keçən il “Qarabağ”a icarəyə verilib. Bu il o, Rusiyanın “Krılya Sovetov” komandasına keçib.