Ana səhifə İdman |
Bu gün "Qəbələ" - "Kəpəz" görüşündə sensasiya qeydə alınıb.
Axar.az-ın verdiyi xəbərə görə, Qəbələnin eyniadlı klubu öz meydanında Gəncə komandasına məğlub olub.
Əslində, dünən keçirilməli olan görüş qatı duman səbəbindən 30-cu dəqiqədə yarımçıq dayanıb və oyun bu günə təxirə salınıb. 30 dəqiqə ərzində cəmi bir qol vurulub. Gəncə təmsilçisinin futbolçusu Aleksandr Sitnik 2-ci dəqiqədə komandasını hesabda önə keçirib.
Bu, turun sensasiyasıdır. Bununla Roman Qriqorçukun komandası artıq üç oyundur qələbəyə həsrət qalır. "Kəpəz" isə artıq beş oyundur uduzmur.
Gəncə komandasının baş məşqçisi Şahin Diniyev deyib ki, oyun maraqlı keçib: "Komandamla fəxr edirəm. Mənim ciddi dəyişikliklər etmək imkanım yoxdur. Sıx qrafikdə komandam qəhrəmancasına mübarizə apardı. Biz öz vaxtımızı gözlədik və qələbə qazandıq".
"Qəbələ"nin baş məşqçisi Roman Qriqorçuk isə hesab edir ki, komandası qollar vurmalı idi: "Amma bunu bacara bilmədik. Üstün oyun sərgiləsək də, qələbə qazanmadıq. Həmin problemləri aradan qaldırmaq lazımdır. Biz üstün oynayırıq, amma qol vura bilmirik. Deməli, hücumların sonluğunu düzəltməliyik".
Tarix
2015.11.01 / 23:19
|
Müəllif
Emil Salamoğlu
|