Əgər OPEK-in son qərarı işləyərsə və real olaraq neftin gündəlik hasilatını azaltmaqla onun qiymətlərinin qalxmasına nail olunarsa, bu halda ABŞ öz şist neft hasilatını artırmaq yolu ilə vəziyyəti istədiyi kimi tənzimləyəcək.

Axar.az xəbər verir ki, keçmiş maliyyə naziri, iqtisadçı professor Fikrət Yusifov bu qənaətdədir. Ekspert bildirib ki, OPEK-in son iki il ərzində keçirdiyi çoxsaylı toplantılardan sonra hasilatın azaldılmasına dair müsbət qərarın nə qədər səmərə verəcəyi şübhəlidir:

“Hesab edirəm ki, qərar müəyyən qədər işləsə belə, lazım olan nəticənin əldə edilməsi mümkün olmayacaq. Neftin qiymətlərini dünya neft hasilatının 1/3-ni verən bir təşkilat həll etmir. Bu təşkilat ona üzv olmayan başqa neft hasil edən bəzi ölkələri də qəbul etdiyi qərara qoşsa da, neftin qiymətlərində ciddi bir dəyişikliyin baş verəcəyi gözlənilən deyil. Dünya bazarlarında neftin qiymətlərinin qalxmasını yalnız ABŞ-dan asılıdır. Neft qiymətlərinin kökündə Rusiya-Qərb, Rusiya-ABŞ qarşıdurmasından qaynaqlanan siyasi motivlər dayanır. Trampın prezident seçilməsi və onun Rusiya ilə münasibətləri yaxşılaşdırmağa dair bəyanatları da bu vəziyyəti dəyişməyəcək. Çünki ABŞ dövlətinin strateji maraqları var və bu maraqlar prezidentin istəyi ilə üst-üstə düşməyə bilər. Əgər OPEK-in son qərarı işləyərsə və real olaraq neftin gündəlik hasilatını azaltmaqla onun qiymətlərinin qalxmasına nail olunarsa, bu halda ABŞ öz şist neft hasilatını artırmaq yolu ilə vəziyyəti istədiyi kimi tənzimləyəcək. Çünki qiymətlər qalxdıqca şist neftinin hasilatı daha çox sərfəli olacaq”.

Qeyd edək ki, noyabrın 30-da Vyanada OPEK-in Nazirlər Şurasının 171-ci iclası keçirilib. Kartelə daxil olan ölkələr neft hasilatının gündəlik 1,2 milyon barrelə qədər azaldılaraq 32,5 milyona çatdırılması barədə razılığa gəliblər.