Rusiya Gürcüstana kölələrə təqdim edilən razılaşmanı təklif edir.

Axar.az xəbər verir ki, bunu jurnalistlərə açıqlamasında Gürcüstanın Vahid Milli Hərəkat Partiyasının liderlərindən olan Roman Qotsiridze söyləyib.

“Qazı Gürcüstana Azərbaycan tədarük edir. Əvvəllər Rusiya ilə danışıqların davam etdirilməsi üçün belə arqument gətirirdilər ki, guya Tiflisin təbii qaza olan tələbatı tam ödənilmir. Lakin “Şahdəniz” konsorsiumu bu problemi həll etdi və bunu yalnız alqışlamaq lazımdır. Minskdə Tiflislə “Qazprom” arasında keçirilən danışıqlarla bağlı keçənilki şübhələr hələ də qalır”, – deyə o bildirib.

Qeyd edək ki, dünən Gürcüstanın Energetika naziri Kaxa Kaladze “Qazprom” şirkətinin nümayəndələri ilə Minskdə görüşüb. Bu, tərəflər arasında son 1 ay ərzində 3-cü görüş olub. “Qazprom” Gürcüstan ərazisindən keçməklə Ermənistana nəql etdiyi təbii qazın 10 faizi həcmində Gürcüstana “mavi yanacaq” verirdi. Bu müqavilənin müddəti 2016-cı il dekabrın 31-də başa çatıb. Tiflis eyni şərtlərin davam etməsində israrlı idi.

Ötən gün isə tərəflər razılıq əldə edib və Rusiyanın təklifi qəbul edilib. Razılığa əsasən, Rusiya tranzit haqqı olaraq pul ödəyəcək, həmçinin Tiflisə satdığı qazın qiymətində güzəşt edəcək. Qaz Tiflisə 215 dollardan deyil, 185 dollardan satılacaq.