Vətəndaş bankla, sığorta şirkəti ilə, mağaza ilə və s. müqavilə bağlayır. Müqaviləni ona hazır vəziyyətdə imzalamağa təqdim edirlər. Adətən müqavilələr müştəri tərəfindən oxunmur, amma imzalanır. Müqavilə standart şərtlər əsasında bağlanmış hesab olunur. Həmin maddələrə görə, bu halda müştəriyə vicdansızcasına və onun əleyhinə olan müddəalara imza etdiriblərsə, həmin müddəalar etibarsızdır və icra olunmalı deyil.

Axar.az xəbər verir ki, bu sözləri hüquqşünas, bank eksperti Əkrəm Həsənov “vətəndaşın hər hansısa qurumla bağladığı müqavilə icra olunmalıdırmı” sualına cavabında deyib.

Ekspertin sözlərinə görə, vətəndaşlar imzaladıqları müqaviləni mütləq oxumalıdır:

“Ancaq oxumayıb imzalasa belə, müştəriyə vicdansızcasına və onun əleyhinə olan müddəalara imza etdiriblərsə, həmin müddəalar etibarsızdır və icra olunmalı deyil.

Buna görə də “Müqaviləni imzalamısan, icra et!” deyənləri yerində otuzdurun! Təbii, əgər imzaladığınız müqavilədə vicdansız müddəalar varsa.

Konstitusiya Məhkəməsinin 2 qərarında qeyd olunur: “Müqavilə məzmununun müəyyənləşdirilməsi azadlığı heç də o demək deyildir ki, tərəflər arasında bağlanan müqavilədə əldə olunmuş bütün razılaşmaların etibarlılığı sübhə altına alına bilməz. Burada əqdlərin etibarsızlığına dair Mülki Məcəllənin 339, 340-342, 344-cü maddələrinin, müqavilələrin standart şərtlərinə dair isə 417-420-ci maddələrinin müddəaları nəzərə alınmalıdır”.

Odur ki, haqlarınızı bilin və tələb edin! Bu halda vəkilsiz də məhkəmədə özünüzü müdafiə edə biləcəksiz!”