Daşkənddəki kultura.uz portalı Azərbaycan Prezidenti İlham Əliyevin sədrliyi ilə Nazirlər Kabinetinin 2017-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında dövlət başçısının nitqində irəli sürülən vəzifələrlə bağlı rus dilində məqalə yayıb.

Axar.az xəbər verir ki, Azərbaycan Prezidenti İlham Əliyev iclasda 2017-ci ildə həyata keçirilən böyük layihələrdən danışıb, ölkə iqtisadiyyatını inkişaf etdirmək üçün bu il qarşıda duran vəzifələr haqqında məlumat verib.

Prezident İlham Əliyev iclasdakı nitqində bildirib ki, Azərbaycanın məşhur turizm mərkəzləri olan Şahdağ və Tufandağa dəmir yolunun çəkilməsi bu yerlərə turist axınını sürətləndirəcək.

Məqalədə qeyd olunur ki, dövlət başçısı bu il Bakı-Tiflis-Qars dəmir yolunun fəaliyyəti üçün önəmli il olacağını bildirib. Prezident İlham Əliyev vurğulayıb ki, “Cənub Qaz Dəhlizi”, Bakı-Tiflis-Ceyhan, Bakı-Tiflis-Qars, “Şimal-Cənub” və digər önəmli layihələrin maliyyələşməsində Azərbaycanın iqtisadi gücü əsas rol oynayıb.