Azərbaycan Respublikasının Prezidenti İlham Əliyevin tapşırığına
əsasən, ölkə ərazisində fəaliyyət göstərən bütün məscidlərin və
digər konfessiyalara mənsub dini məbədlərin istilik sisteminə təbii
qazın təmənnasız verilməsi qərara alınıb.
Bəs, bunun icra mexanizmi necə olacaq? İstifadə edilən qazın pulunu
dini məbədlərin əvəzinə kim ödəyəcək?
Neft Araşdırmaları Mərkəzinin rəhbəri İlham Şaban hesab edir ki,
Dövlət Neft Şirkətinin (SOCAR) rəsmi məlumatına əsasən, dini
məbədlərin istilik sisteminə təbii qazın pulsuz verilməsi
Prezidentin birbaşa SOCAR-a tapşırığıdır. Yəni bu məsələnin icrası
SOCAR-a həvalə olunub. Əgər Prezidentin bununla bağlı Sərəncamı
olsaydı və orada Nazirlər Kabinetinə göstəriş verilsəydi ki,
buradan irəli gələn məsələləri həll etsin, onda müvafiq qaydada
Dini Qurumlarla İş üzrə Dövlət Komitəsinə vəsait ayrılardı ki, onun
vasitəsilə SOCAR-ın borcu ödənilsin. Buradan isə belə məlum olur
ki, bundan sonra hər bir dini məbədin qaza olan xərcləri SOCAR
tərəfindən ödəniləcək.
Qeyd edək ki, Azərbaycan Respublikasında hazırda 2 minə yaxın dini
məbəd mövcuddur.