Bu gün Azərbaycan Prezidenti İlham Əliyevin sərəncamı ilə yazıçı-publisist, millət vəkili Elmira Axundova “xalq yazıçısı” fəxri adına layiq görülüb.

Kult.az xəbər verir ki, Elmira Hüseyn qızı Axundova 1953-cü il mayın 26-da Moskva vilayətinin Ramensk rayonunda anadan olub. Bakı xoreoqrafiya məktəbi yanında ümumtəhsil məktəbini bitirdikdən sonra şəhər 3 saylı texniki məktəbində stenoqrafiya ixtisasına yiyələnib.

1976-cı ildə BDU-nun Filologiya fakültəsini fərqlənmə diplomu ilə bitirib. İlk bədii tərcüməsini - Hüseyn İbrahimovun "Nəcibənin ürəyi" hekayəsini 1978-ci ildə, ilk elmi məqaləsini isə 1979-cu ildə "Literaturnıy Azerbaydjan" jurnalında çap etdirib.

Əmək fəaliyyətinə stenoqrafçı kimi başlayıb, sonra Azərbaycan Dövlət Televiziya və Radio Verilişləri Komitəsində kiçik redaktor (1977-1980) olub. Azərbaycan Yazıçılar İttifaqında referent, məsləhətçi işləyib (1980-1988). Azərbaycan EA Nizami adına Ədəbiyyat İnstitutunun Cənubi Azərbaycan ədəbiyyatı şöbəsində böyük elmi işçi olub (1988-1991). "Literaturnaya qazeta"nın (1990-1998), "Azadlıq" radiostansiyasının (Münhen) Azərbaycan üzrə müxbiri (1993-2000), "Türk dünyası" jurnalının publisistika şöbəsinin müdiri vəzifələrində çalışıb.

Azərbaycan Yazıçılar Birliyi katibliyi heyətinə (informasiya məsələləri üzrə katib) seçilib (1991). Azərbaycan Prezidenti yanında Əfv Komissiyasının üzvüdür (1995-ci ildən).

Hazırda Bakı Slavyan Universitetinin tərcümə nəzəriyyəsi və təcrübəsi kafedrasının dosentidir (2002-ci ildən). Onun tərtib və tərcümə etdiyi "Azərbaycanın gənc nəsri" antologiyası 1984-cü ildə "Yazıçı" nəşriyyatında kütləvi tirajla buraxılıb.

Rus dilində "Fərmanla əfv edilmişdir..." (2000), "Poliqrafçının ölümü" (2001), "Həqiqət anı" (2003), "Əlövsət Quliyev: o tarix yaradırdı" (2003, şərikli), "Bu bizik" (2003), "Yaşamaq əyyamı" (2003) kitabları kütləvi tirajla buraxılıb.

2005-ci ildən Milli Məclisin üzvüdür.

Qeyd edək ki, E.Axundova “xalq yazıçısı” adına layiq görülməsi ilə bağlı sərəncamdan xəbərsiz olub. Oxu.az olayla bağlı millət vəkilinin münasibətini öyrənmək istəyib. E.Axundova isə “nə sərəncam?” deyə təəccüblənib və sərəncamın oxunmasını xahiş edib. Daha sonra iştirak etdiyi tədbirdə sərəncamı indi eşitdiyini elan edib və bu, gurultulu alqışlarla müşayiət olunub.