Ana səhifə Kult |
Taban Məhəmmədxani 1989-cu ildə Güney Azərbaycanın Xudafərin rayonunun Dirili kəndində anadan olub. Haqq aşığı Dədə Qurbaninin bu kənddən olduğu deyilir.
Kult.az xəbər verir ki, o, orta məktəbi doğulub böyüdüyü Dirilidə bitirib. Təbriz şəhərinin Azade Universitetində mühasib ixtisası alıb.
Hacıxanlı tayfasından olan Məhəmmədxaninin ailəsinin muğam və musiqiyə xüsusi rəğbəti olub. Gənc ifaçı da əsgərliyi bitirər- bitirməz Təbrizdə “Ruşən” adlı musiqi məktəbində iki il ustad Əhməd Səttardan, iki il də Nasir Ətapurdan (Arif Babayevin tələbəsi olub) dərs alıb. Hər iki ustad Bakıda Konservatoriyanın muğam sinfini bitiriblər.
O, Təbrizdə keçirilən birinci və ikinci muğam festivalında ikinci yeri tutub. Ərdəbildə keçirilən “Dədə Qurbani” aşıq festivalında, Tehranda “Aşıq Şəmşir” festivalında və müxtəlif tədbirlərdə çıxış edib.
Xanəndə “Söyləmədim mən ona”, “Lalələr” “İnanmışam”, “Niyə bilmədin”, “Qayıt gəl”, “Ata həsrəti”, “Qəlbində saxla məni” kimi mahnıları ifa edib. Bir ildir yeni albomu üzərində işləyir.
Gənc ifaçı Təbrizin “Səhənd”, Bakının isə “Lider” kanalının dəfələrlə qonağı olub, musiqimizi təmsil edib.
Çox sevilən və bir çox tədbirlərə dəvət alan ifaçılardandır. İki il Təbriz milli orkestrının solisti olub.
Hazırda Çingiz Mehdipurun rəhbərlik etdiyi “Dalğa” qrupunun solistidir və “Sarı bülbül” qrupunda da fəaliyyət göstərir.
Tarix
2018.10.27 / 22:37
|
Müəllif
Aytac Araz
|