Bütün Şərq ölkələrində, eləcə də Azərbaycanda kifayət qədər tamaşaçı kütləsi olan "Qurlar vadisi" serialını ərsəyə gətirən "Pana Film" studiyası yeni serial hazırlayır. Səlcuqilər İmperatorluğundan bəhs edəcək filmin adı "Xaşxaşilər"dir.

Axar.az xəbər verir ki, serialda Alparslan, Həsən Sabbah, Nizamülmülk və Ömər Xəyyam kimi tarixi şəxsiyyətlərin xarakterləri də canlandırılacaq.

Həsən Sabbahın liderlik etdiyi "Xaşxaşilər"in Səlcuqilərə qarşı fəaliyyətlərindən bəhs edən serialda Ələmut qalası da var. "Pana Yazım" tərəfindən yazılan ssenarinin məsləhətçiliyini prof.dr. Məmməd Polad edir. Oyuncu heyəti haqqında isə bütün məlumat hələ ki, gizli saxlanılıb. "Pana Film"in yaxın vaxtlarda planlaşdırdığı layihələri arasında "Alparslan" serialı da var.

Xatırladaq ki, Xaşxaşilər, Həşişilər və ya Assasinlər kimi adlandırılan təşkilat şiəliyin ismaililər məzhəbinin nizarilər qoluna aid olan qruplaşma olaraq Həsən Sabbah tərəfindən 1090-cı ildə Ələmut qalasında yaradılıb.