Yeni il gecəsi İstanbulda 39 nəfəri öldürən Əbdülqədir Maşaripov adlı İŞİD üzvü ilə bağlı yeni detallar ortaya çıxıb.

Axar.az xəbər verir ki, terrorçu hadisəni törətdikdən sonra 3 özbəyin Hatay vilayətində yaxalandığını eşidib, nə edəcəyini bilməyib.

Daha sonra Konyadakı təşkilat üzvləri ilə əlaqə saxlamağa çalışıb. Qısa müddət sonra İstanbulun Əsənyurd rayonundakı İŞİD-çilər özləri onu axtarıb tapıb.

Qatilin gizləndiyi evə təşkil edilən əməliyyat zamanı Maşaripov çarpayının altında gizlənibmiş. Polisdəki mənbələrdən verilən məlumata görə, tutulan zaman olduqca həyəcanlı olan terrorçu polisə yalvarıb, öldürülməməyini xahiş edib.

Əbdülqədir Maşaripov ilk ifadəsində hadisəni necə törətdiyini, məkanı necə seçdiyini, hücum zamanı və sonra gördüyü işlər barədə detallı məlumat verib.

Qeyd edək ki, Maşaripov oğlunu bir müddət öncə başqa bir İŞİD üzvünün yanına göndərib. Həyat yoldaşı və qızı ötən həftə İstanbulun Pendik rayonunda saxlanılıb.