ABŞ-ın yeni seçilmiş prezidenti Donald Tramp ABŞ səfirliyinin Qüdsə köçürülməsi barədə dediyi sözləri unutmadığını açıqlayıb.

Axar.az xəbər verir ki, Tramp vədinə əməl edəcəyini deyib:

“Təbii ki, Qüdslə bağlı verdiyim vədi çox yaxşı xatırlayıram. Mən verdiyim sözü tutan bir şəxsəm. İsrail ilə əməkdaşlığı səbirsizliklə gözləyirəm”.

ABŞ rəhbərliyinin 1995-ci ildə qəbul etdiyi Qüds səfirliyi qanunu İsrail paytaxtı Tel-Əvivdə yerləşən səfirliyi Qüdsə köçürülməsini nəzərdə tutur. Ancaq sözügedən qanun layihəsi 21 ildir ki, Bill Klinton, Corc Uoker Buş və Barak Obamanın prezidentliyi dövründə hər 6 aydan bir milli təhlükəsizlik səbəbindən təxirə salınıb.

Ümumiyyətlə, respublikaçılar uzun müddətdir ABŞ-ın Tel-Əvivdəki səfirliyinin Qüdsə köçürülməsini tələb edir. Ancaq heç bir ABŞ hökuməti İsrail paytaxtının Qüds olması barədə addım atmayıb.

Müsəlmanlar, yəhudilər və xristianlar üçün müqəddəs sayılan bu şəhər Fələstinin paytaxtıdır. Lakin Qüdsdə yaşayan yəhudilərin sayı çox olduğundan şəhər Şərqi və Qərbi Qüds olmaqla iki yerə parçalanıb.

Şərqi Qüds 1967-ci ildən İsrail işğalı altındadır.