Amerikalıların 48%-i Avropa Birliyinin xarici təhdidlərdən qorunmaq üçün ABŞ və NATO-ya ehtiyacı olmadığını düşünür.

Axar.az xəbər verir ki, bu nəticə “Sputnik” agentliyi və “İFop” şirkətinin apardığı sorğudan sonra ortaya çıxıb. Agentlik Amerikadan fərqli olaraq Avropada yanaşmanın başqa cür olduğunu bildirib. Belə ki, AB-nin ABŞ və NATO-ya ehtiyacı olduğuna daha çox polşalılar (65%), italiyalılar (65%) və almanlar (63%) əmindirlər. İspaniyada bu fikrə tərəfdar çıxanların sayı 56%, Böyük Britaniyada 54%, Fransada isə 53% təşkil edir.

Bununla yanaşı, Avropa Birliyinin özünümüdafiə qabiliyətinə şübhəsi olmayanların ən yüksək sayı Fransa (30%), İspaniya (33%) və ABŞ-dadır (31%). AB-nin təhlükəsizlik məsələsində ABŞ və NATO-ya ehtiyacı olmadığını düşünənlərin sayı 50 yaşa qədər olan əhali və solçu partiya tərəfdarları arasında daha çoxdur. Polşadan savayı digər ölkələrdə bunlar, əsasən ali təhsilə, yüksək gəlirə və sosial statusa malik insanlardır.

Qeyd edək ki, sorğu 22-26 oktyabr tarixlərində keçirilib. Sorğuda Fransa, Almaniya, İtaliya, Polşa, Böyük Britaniya və ABŞ-da 18 yaşdan yuxarı 7043 respondent iştirak edib. Etibarlılıq 95% olmaqla, ölkə üzrə maksimal səhv göstəricisi 3,1%-dir.