Regionların sosial-iqtisadi inkişafı Dövlət proqramları uğurla icra edilir.

Axar.az xəbər verir ki, bunu Prezident İlham Əliyev ötən gün Saatlıda pambıqçılığın inkişafı məsələlərinə dair respublika müşavirəsində yekun nitqində deyib.

"Regionların sosial-iqtisadi inkişafı Dövlət proqramları uğurla icra edilməsi Azərbaycanda yeni reallıqlar yaratmışdır. Azərbaycanda müasir infrastruktur yaradılmış, elektrik enerjisi, qazlaşdırma, içməli su, meliorasiya problemləri həll olunur, kənd və magistral yollar tikilir.

İnfrastrukturun yenilənməsi biznes üçün daha yaxşı şərait yaranmış, sosial-iqtisadi inkişafa təkan verilmişdir", - İlham Əliyev söyləyib.

Prezident kənd yollarına dair 40-dan çox layihənin icra edildiyini, bunun nəticəsində yüzlərlə kəndin birləşdiriləcəyini bildirib:

"2017-ci ilin 3 ayında Azərbaycanda 40 mindən çox yeni iş yeri yaradılıb. Bəzi qonşu ölkələrdə işsizlik artıq böhran həddinə çatır, orada demoqrafik böhran yaşanır. İşsizliklə mübarizədə Azərbaycan dünya miqyasında nümunəvi ölkə kimi göstərilir. İlin əvvəlindən ancaq ictimai işlərə 40 mindən çox vətəndaş cəlb edilmişdir".