ABŞ Federal Təhqiqat Bürosunun (FTB) İŞİD qruplaşmasına qarşı istintaqda iştirak etmək üçün təlimatlandırılan qadın üzvü Suriyaya gedərək orada terrorçulardan biri ilə evlənib.

Axar.az xəbər verir ki, CNN telekanalı Daniella Qrin adlı qadın əməkdaşın rəhbərliyə xəyanət edərək, Denis Kaspert adlı İŞİD üzvü olan ərini axtarıldığı ilə bağlı xəbərdar etdiyini yazıb. Qrin 2014-cü ildə ərə getsə də, ABŞ mətbuatı bu haqda yalnız indi xəbər tutub.

Telekanal bildirir ki, ərə gedəndən cəmi bir neçə həftə sonra Qrin öz səhvini başa düşüb və ABŞ-a qayıdıb. Burada isə onu həbs ediblər. Qrin hökumətlə işləməyə razılıq verib. İki ildən sonra isə o, azadlığa çıxıb.

Qeyd edək ki, 2015-ci ilin oktyabrında CNN telekanalı 39 yaşlı Kaspertin ABŞ aviasiyasının Suriyada həyata keçirdiyi avizərbələr zamanı öldüyünü bildirmişdi. Kaspert Dövlət Departamentinin ən təhlükəli terrorçular siyahısında yer alırdı.