Mosulda 9 ay davam edən münaqişəyə görə şəhərdən qaçaraq müxtəlif düşərgələrə üz tutan vətəndaşların geri dönməyə evləri qalmayıb.

Axar.az xəbər verir ki, xalabalığa dönən şəhərin yenidən qurulması, infrastrukturun təmir edilməsi üçün 150 milyard dollara ehtiyac olduğu bildirilib. Dəyən zərərin qarşılanmasında Türkiyə və Küveyt də daxil olmaqla, bir neçə ölkə yardıma hazır olduğunu açıqlayıb.

Birləşmiş Millətlər Təşkilatı şəhərin qərbində terrorçularla İraq təhlükəsizlik qüvvələrinin qarşıdurması zamanı yalnız son 3 həftədə 5 min binanın məhv olduğunu bildirib.

Qeyd edək ki, Mosulda münaqişə nəticəsində minlərlə bina çöküb, qədim şəhər adlanan bölgə tamamilə dağıdılıb, hava hücumları, küçə qarşıdırmaları nəticəsində yaşayış sahələri, məktəblər, xəstəxanalar, Mosul hava limanı viran olub, 850 illik Nuri məscidi dağıdılıb, Dəclə çayı üzərindəki körpülərin bəziləri uçurulub, elektrik və su şəbəkələrinə zərər dəyib, ən azı 8 min insan isə evindən didərgin düşüb.