ABŞ-da işsizlərin 6,3 %-i işlə təmin olunub.

Axar.az xəbər verir ki, may ayı ərzində ABŞ-da işsiz insanların 6,3 faizi yeni iş yeri tapıb. Mediaya ötürülən rəsmi rəqəmlərə görə, aprel ayında isə 288 min insan işlə təmin edilmişdi. Yeni iş yerləri ilə yanaşı həm də əməkhaqqılarında da artım müşahidə edilib. Belə ki, rəsmi rəqəmlərə görə, insanların hər saat üçün olan qazancları orta hesabla 5 sent artıb. Ümumilikdə isə maaşlar son 12 ayda 2,1 faiz yüksəlib. Hazırda bir amerikalı hər həftə orta hesabla 34,5 saat işləyir.

Son 1 ilin nəticələrinə əsasən, hər ay təxminən 197 min adam işlə təmin edilib.

İqtisadçı ekspert Natiq Cəfərli hesab edir ki, ABŞ-da yeni iş yerlərinin açılması ilə bağlı xəbərlərin dünya mediasının gündəmini zəbt etməsi normal haldır və bu proses inkişafda olan ölkələrin iqtisadi səviyyəsinə də təsir edəcək:

"Yeni iş yerlərinin açılması qlobal indikatorlardan biridir. Əgər yeni iş yerləri açılırsa deməli vəziyyət yavaş-yavaş düzəlir. Amerikanın Federal Rezerv Sistemi (FRS) dəfələrlə elan edib ki, yeni iş yerlərinin açılması, iqtisadi aktivliklə bağlı indekslərdə hansısa artım olarsa 2008-ci ildən bəri onların iqtisadiyyata ayırdıqları pulların məbləğini azaldacaq. Bu rəqəm təxminən hər ay üçün 85 milyard dollar məbləğindədir. Son məlumatlara görə artıq 30 milyardını azaldıb. Əgər FRS iqtisadiyyata yardımı azaltsa bu bəzi ölkələrə valyuta daxil olmasında zəifləmə olacaq. Xüsusən də Türkiyə, Braziliya, Çin, Rusiya kimi ölkələrdə problemlərin yarana biləcəyi ilə bağlı iqtisadçıların ümumi bir fikri var"

Ekspert hesab edir ki, ABŞ-da yeni iş yerlərinin açılması qızılın qiymətinə də təsir edəcək:

"Əgər işsizlərin sayı azalarsa bu həm inkişafda olan ölkələrin iqtisadiyyatına həm də əmtəə bazarına təsir edəcək. Xüsusən neftin və qızılın qiymətində artım olacaq. Federal Rezerv Sistemi əgər yardımları ləğv eləsə bu uçot dərəcələrinin qiymətlərinə də təsir edəcək. Düşünürəm ki, FRS uçot dərəcələrini qaldıracaq və bu da ucuz pulların aradan çıxması ilə nəticələnə bilər. Ucuz pulların sıxışdırılması isə öz növbəsində kreditləşmədəki problemlərin aradan qaldırılmasına da müsbət təsir edəcək. Məhz buna görə də bütün dünya ABŞ-dakı yeni iş yerlərinin açılması ilə bağlı məsələləri gündəmdə saxlayır".

Xatırladaq ki, 2008-2010-cu illərdəki iqtisadi böhran dövründə ABŞ-da orta hesabla 3 milyona yaxın insan işindən olmuşdu. Obama hökuməti bu problemi tezliklə çözəcəyini bildirmişdi.