BMT-in Baş katibi Pan Ki Mun 70 illik yubileyini Boliviyada şəxsən onun üçün kokain yarpaqlarından hazırlanmış tort ilə qeyd edib.

Axar.az məlumat verir ki, Pan Ki Mun Boliviyaya 34 ölkə başçısının iştirak edəcəyi "Qrup 77" (G77) sammitinin açılış mərasiminə səfəri ad günü ilə eyni vaxta təsadüf edib.

Öz ad günündə Pan Ki Mun Boliviya prezidenti Evo Maraleslə birlikdə Santa Kruz yaxınlığında yerləşən El-Tornoda ictimai obyektlərin açılış mərasimində iştirak edib. Bundan sonra bütün iştirakçılar onu ad günü münasibəti ilə təbrik edərkən yerli hökumət kokain yarpaqlarından hazırlanmış və üzərində 70 şam olan tort təqdim edib. Daha sonra isə uşaq xoru Baş katib üçün üç - ispan, ingilis və hind dilində "Happy Birthday"(Ad günün mübarək) mahnısını oxuyub.

Boliviya Prezidenti qeyd edib ki, kokain yarpağının istehsalçıları nə narkomafiya deyil, nə də narkoman və yarpağın özü də kokain deyil.