ABŞ yeni sanksiyalarla Rusiyada özünə rəqib hesab etdiyi hərbi sənaye komplekslərini zəiflətmək məqsədi güdür.

Bu sözləri Axar.az-a açıqlamasında ABŞ-ın Rusiyanın müdafiə sənayesinə qarşı tətbiq edəcəyi sanksiyalar və yeni qanun layihəsinin Rusiyadan silah idxal dövlətlərə təsiri məsələsini şərh edən politoloq, millət vəkili Rasim Musabəyov deyib. Deputat bildirib ki, ABŞ-ın yeni sanksiyaları birbaşa Rusiyanın hərbi sənaye kompleksinə qarşı yönəlib:

“ABŞ-ın bir məqsədi var, o da Rusiyada özünə rəqib hesab etdiyi hərbi sənaye komplekslərini zəiflətmək. Konqres qanun layihəsini qəbul edərsə, sanksiyaların Rusiyadan silah alan ölkələrə təsir göstərəcəyini düşünmürəm. Sadəcə, Rusiyadan alınan silahların təminatı məsələsi qalır ki, bu da sanksiyalardan asılı deyil”.

Millət vəkili Asim Mollazadənin sözlərinə görə, Vaşinqtonun yeni sanksiyaları Moskvanın Ukrayna və Yaxın Şərqdəki müdaxilələrinə bir cavabdır:

“ABŞ-ın yeni sanksiyaları əsasən Rusiyaya qarşı yönəlib. Ona görə sanksiyaların Rusiyadan silah idxal edən dövlətlərə heç bir təsiri olmayacaq. Bununla yanaşı, ABŞ-ın Rusiya və bu ölkənin müvafiq qurumları ilə əməkdaşlıq edən şirkətləri, bəzi şəxsləri də müvafiq cəzalara məruz qalacaqlar”.

Qeyd edək ki, ABŞ Rusiya müdafiə sənayesinə qarşı yeni sanksiyalar hazırlayır. Tillerson artıq sanksiyaların tətbiq olunacağı müəssisələrin siyahısını hazırlayıb. ABŞ Dövlət Departamentinin rəsmi nümayəndəsi Hizer Noyert siyahıya salınacaq şəxslərin adlarının hələlik gizli saxlanıldığını bildirib.