Ermənistan kimi ölkəyə 1 milyard dollarlıq investisiya yatırıla bilməz.

Axar.az xəbər verir ki, bunu “1in.am” saytına müsahibəsində erməni politoloq Ağasi Yenokyan söyləyib.

“Bu investisiya mümkünsüzdür. Ona görə ki, hər kəs bizim ölkədəki korrupsiyadan xəbərdardır. Buraya qoyulan pullar dərhal oğurlanacaq. Hətta bizim yerli hökumət belə bu cür məbləği Ermənistana yatırmır. Onlar bilirlər ki, necə ölkə yaradıblar və bunun üçün oğurladıqları pulları Ermənistandan çıxardırlar. 1 milyard Ermənistan üçün çox böyük məbləğdir. Belə pullar populizm və ya hakimiyyətin saxlanılması üçün yatırılmır. Bu qədər böyük məbləğ ancaq çirkli pulların yuyulması üçün lazımdır”, – deyə o bildirib.

Onun sözlərinə görə, hazırda Moskva Serj Sərkisyanın həm siyasi tərəfdarı, həm də siyasi opponenti rolunu oynayır:

“Moskvaya onun tələblərini mübahisəsiz yerinə yetirən Serj Sərkisyan lazımdır. Bu tələblər sırasında Avropa Birliyi ilə razılaşmanın icra edilməməsi, Qarabağ konfliktinin həllinə hazırlıq, Ermənistanın ermənilərdən azad edilməsi yer alır. Qarabağ problemi, yeni 27 oktyabr teraktı, rus oliqarxları, burjua-demokrat inqilabı, küçə aksiyaları və digərləri ilə Rusiya Serj Sərkisyanı daim gərgin vəziyyətdə saxlayır. Ermənistana 1 milyardlıq yatırım edən ən varlı erməni Samvel Karapetyana gəlincə isə, o da Moskvadan asılıdır. Onun bütün sərvəti Rusiyadadır. O öz var-dövlətini itirməmək üçün Kremlin siyasi sifarişlərini icra edir”.

Qeyd edək ki, bundan öncə Samvel Karapetyan Ermənistanın energetik sferasına 1 milyard dollar yatırım edəcəyini açıqlayıb.