Ana səhifə Planet |
Livanın istefa verən Baş naziri Saad Həriri yaxın günlərdə Beyruta qayıdacağını təsdiqləyərək, orada öz gələcək addımlarını rəsmən açıqlayacağını bəyan edib.
Axar.az xəbər verir ki, Həriri bunu jurnalistlərə Yelisey sarayında Fransa Prezidenti Emanuel Makronla görüşünün yekunları barədə danışarkən bildirib.
“Livanda siyasi vəziyyətə gəlincə, mən yaxın günlərdə Beyruta gedəcəyəm, müstəqilliyimizin qeyd olunmasında iştirak edəcəyəm, məhz orada respublikamızın prezidenti, general Mişel Aunla görüşdükdən sonra bütün mövzular üzrə öz mövqeyimi elan edəcəyəm”, - Həriri belə deyib.
Ailəsi ilə birlikdə Ər-Riyaddan Parisə gələn Həriri Fransa Prezidenti Emanuel Makrona dəvətə və dəstəyə görə xüsusi minnətdarlığını ifadə edərək deyib ki, bu dostluq jestini heç vaxt unutmayacaq.
Xatırladaq ki, Livanın Baş naziri Saad Həriri noyabrın 3-də Səudiyyə Ərəbistanına səfərə getmiş və orada gözlənilmədən öz postundan istefa verdiyini elan etmişdi.
Tarix
2017.11.18 / 20:10
|
Müəllif
Aytac Araz
|