Rusiya Suriyadakı hərbi əməliyyatları dekabrda bitirəcək.

Axar.az xəbər verir ki, bu barədə informasiyanı RBK agentliyi yayıb. Agentlik Rusiyanın Suriyada hərbi kontingent və öz bazalarının fəaliyyəti üçün hərbi texnika qoyaraq çıxacağını bildirib. Əməliyyatların bitməsi ilə Rusiya Hərbi Kosmik Qüvvələri terrorçulara aviazərbələri dayandıracaq:

“Hərbi texnika və hərbçilərin sayı maksimal səviyyədə azalacaq. Burada Hmeymim aviabazasının və Tartus bazasının fəaliyyəti üçün texnika qalacaq. Mənbə bildirib ki, əməliyyatların dayandırılması ölkədəki seçki ilə əlaqədar deyil. O, Rusiyanın bu imkanı hər zaman axtardığını söyləyib”.

Qeyd edək ki, bu gün Putin Suriya Prezidenti Bəşər Əsədlə Soçidə görüşündə də bu məqama işarə etmişdi. Putin bildirmişdi ki, Suriyada hərbi əməliyyatlar başa çatmaqdadır.

Onun sözlərinə görə, terrorçuluqda mübarizə sahəsində tam qələbə qazanmağa, əlbəttə, hələ çox var: “Suriya ərazisindəki terrorçularla mübarizə sahəsində birlikdə keçirilən hərbi əməliyyatlar isə həqiqətən sona çatır”.