Rusiyaya qarşı yeni sanksiyalar hazırlayan Donald Tramp administrasiyasının qara siyahısında Türkiyənin S-400 zenit raket kompleksləri alacağı “Rosoboroneksport” şirkəti də yer alıb.

Axar.az xəbər verir ki, bununla rəsmi Vaşinqton S-400-lərin alışı zamanı Türkiyəni dollardan istifadə etmək, ABŞ bank və pul transferi sisteminə daxil olmaq və ABŞ-la əməkdaşlıq edən vasitəçi təşkilatların köməyindən istifadə etmək imkanlarından məhrum etməyə çalışıb.

Qarşılıqlı ticarəti milli pul vahidləri ilə etməyə qərar verən Türkiyə və Rusiya bu anlamda ilkə imza atıb. Türkiyə S-400 zenit raket komplekslərinin ilkin ödənişini 2.5 ay əvvəl rublla ödəyib. Bu ödəmə Ankara və Moskva arasında yüksək məbləğdə aparılan ilk ticarət olub.

Bununla da Türkiyə ABŞ-ın həmləsinə qarşı tarixi fənd işlətmiş olub.

Qeyd edək ki, Türkiyənin Rusiya ilə bağladığı S-400 zenit raket kompleksi təchizatına dair müqavilənin məbləği 2 milyard dollardan çoxdur.