Rusiyanın Suriyadakı hərbi bazası öz fəaliyyətini davam etdirəcək.

Bu sözləri Axar.az-a Rusiya Prezidenti Vladimir Putinin rus ordusunun Suriyadan çıxarılması haqqında sərəncamını şərh edən politoloq İlqar Vəlizadə deyib. Ekspert bildirib ki, Rusiya qoşunlarının Suriyadan çıxarılması prosesi qismən baş tutacaq:

“Rusiya Müdafiə naziri Sergey Şoyqunun ölkəsinin Suriyada İŞİD-ə qarşı apardığı müharibənin sona yetdiyini bəyan etməsindən sonra rus qoşunlarının nə vaxtsa Suriyadan çıxarılacağı bəlli idi. Sadəcə, bu proses tam şəkildə reallaşmayacaq. Rusiyanın Suriyadakı hərbi bazası öz fəaliyyətini davam etdirəcək. Sadəcə, bu bazanın profilində, yaxud fəaliyyətində müəyyən korrektələr aparıla bilər. Ancaq bazanın əsas məqsədləri dəyişilməz olaraq qalacaq. Əslində, Rusiya qoşunlarını Suriyadan tamamilə çıxarmır. Nə qədər ki, Türkiyənin qoşunları, İranın hərbi müşavirləri Suriyadadır, Rusiyanın qoşunları da bu bölgədə qalacaq”.

Politoloq bildirib ki, Rusiyanın Suriyadakı qoşunlarının rolu, funksiyası ilə bərabər, onların kəmiyyətində də dəyişikliklər baş verəcək:

“Suriyada rus qoşunlarının sayının azalması müşahidə oluna bilər. Bu da mövcud şəraitdə Rusiyanın Suriyadkı hərbi mövcudluğunun optimallaşdırılması ilə nəticələnəcək”.

Qeyd edək ki, Rusiya Prezidenti Vladimir Putin rus ordusunun Suriyadan çıxarılması haqqında sərəncam verib. Bununla bərabər, Rusiya ordusuna məxsus 4-5 qırıcının hələ Suriyada qalacağı bildirilib.