Noyabrda Çeçenistan DİN-nin Qroznı üzrə idarə rəisinin səlahiyyətlərinin icraçısı təyin olunmuş Xas-Maqomed Kadırovun rütbəsi kiçik leytenantdır.

Axar.az Oxu.az-a istinadla xəbər verir ki, Kadırova bir neçə polkovnik, polkovnik-leytenant, mayor, kapitan və digər yüksək rütbəli polis zabitləri tabedir. Çeçenistan DİN-nin Qroznı İdarəsinin əvvəlki rəisi Abuşeyx Vismuradovun rütbəsi isə polkovnik idi.

Rusiyanın “Fontanka” nəşri yazır ki, yeni vəzifədə başladığı ilk gündə, dekabrın 20-də Kadırov geniş toplantı keçirib. Qəzet Qroznının yeni polis rəisinin yaşını öyrənməyə çalışsa da, növbətçi hissədən bu barədə məlumatsız olduqlarını bildiriblər.

Yeni rəis idarə kollektivinə dekabrın 18-də təqdim olunub. Bu barədə İnstaqramda Çeçenistan rəhbəri Ramzan Kadırov özü xəbər verib.

O, Xas-Maqomed Kadırovu enerjili və zəhmətsevər rəhbər adlandırıb. “Əvvəllər tutduğu vəzifələrdə özünü yalnız əla tərəfdən göstərib”, - deyə Kadırov qeyd edib.