Əbu-Dabi polisi 2017-ci ildə 774 kibercinayət hadisəsinin üstünü açıb. Yerli KİV-lər polis idarəsinin cinayət axtarışı şöbəsinin rəisi Tariq əl Qolanın məlumatına istinadla bildirirlər ki, bu cinayətlərdən 206-sı şantaj xarakterində olub.

Axar.az xəbər verir ki, Qolanın sözlərinə görə, Əbu-Dabi polisi kibercinayətlərə qarşı mübarizədə ən müasir üsullarla xüsusi tədbirlər həyata keçirib. O, ictimaiyyəti internetdə təhlükəsizlik tədbirlərindən istifadə etməyə, dələduzların qurbanına çevrilməməyə, spam linklərə daxil olmamağa çağırıb. Qeyd edib ki, istifadəçinin sosial şəbəkələrdə daxil olduğu saytların etibarlılığına 100 faiz əmin olması, habelə öz şəxsi məlumatlarını şübhəli şəxslərə açmaması zəruridir.

Şöbə rəisi dünya qlobal şəbəkəsindən cinayət yolu ilə asan qazanc kimi istifadə edən dələduzlara qarşı mübarizədə Əbu-Dabi polisinin əsas bölməsi olan Kibercinayətlə Mübarizə Departamentinin rolunu xüsusi vurğulayıb.