Rusiya Prezidenti Vladimir Putin 2014-cü il fevralın 22-dən 23-nə keçən gecə Krımın anneksiyası məsələsini təcili toplantıda qaldırdı.

Axar.az “Ukrinform”a istinadla xəbər verir ki, bu barədə Kiyev rayon məhkəməsində keçirilən prosesdə Rusiya Dumasının keçmiş üzvü İlya Ponomaryovun ifadəsində bildirilir.

“Rusiya Dövlət Mühafizə Xidmətinin bir zabiti sonralar danışırdı ki, 22 fevraldan sonra Putin Soçidə aviaqəzadan son anda qurtuldu. Belə ki, onun helikopteri çox sərt şəkildə yerə oturub və ciddi narahatlıq yaranıb. Putin isə bu olayı xarici xüsusi-xidmət orqanlarının cəhdi kimi dəyərləndirdi. Həmin gün Yanukoviç ölkədən qaçmışdı, ona görə də onda belə bir rəy vardı ki, sui-qəsd ətrafda dolaşır.

Fevralın 22-dən 23-nə keçən gecə isə Kremldə Putin ən yaxın ətrafı ilə toplantı keçirdi. O toplantıda iştirak edənlərdən biri mənə demişdi ki, orada Ukrayna məsələsi müzakirə edilib. Məhz bu müzakirədə Krımın anneksiya məsələsi qoyuldu”, - Ponomaryov deyib.