Ana səhifə Planet |
Rusiyanın Britaniyadakı səfirliyi bu ölkədə zəhərlənən Sergey Skripalla bağlı nota alıb.
Axar.az xəbər verir ki, bu barədə Rusiyanın Londondakı səfiri Aleksandr Yakovenko məlumat yayıb. Səfir bildirib ki, onlara Skripal və qızının kritik vəziyyətdə olduğu barədə yenicə məlumat verilib.
“Ancaq biz bu məlumatı yetərli saya bilmərik. Britaniya hələ də bizdən tibbi nəticələri gozlədir, bizim xəstəxanaya girməyə icazəmiz yoxdur, həkimlərlə danışa bilmirik. Hətta Skripalın xəstəxana fotosu da yayılmayıb. Bəlkə, onlar ölüb, bəlkə sağdır, bəlkə, ümumiyyətlə, bu zəhərlənmə olayı baş verməyib, deyilənlər hamısı quramadır? Bizim inanmağımız üçün sözdən başqa heç nə təqdim etmirlər”, - səfir bildirib.
Yakovenko qeyd edib ki, London səfirliklə heç bir detalı bölüşmür:
“Tutaq ki, Sergey Skripal Britaniya vətəndaşıdır və onun sağlıq durumu ilə bağlı məlumat verməkdən imtina edirlər. Amma onun qızı Yuliya Rusiya vətəndaşıdır, axı. Onun haqqında bizə məlumat verməyə borcludurlar. Bu, beynəlxalq normalara ziddir. Biz Vyana Konvensiyasına əsasən, Rusiya vətəndaşının sağlıq durumu ilə bağlı bütün informasiyaları almaq hüququna malikik. Bundan niyə imtina edirlər?”
Qeyd edək ki, 5 martda Rusiya Hərbi Kəşfiyyat İdarəsinin keçmiş polkovniki Sergey Skripal və qızının Britaniyada zəhərlənməsindən sonra Britaniya-Rusiya münasibətləri kəskin pisləşib.
Tarix
2018.03.17 / 02:08
|
Müəllif
Axar.az
|