Yeni dövrdə TBMM-lə yaxın əməkdaşlıq və həmrəylik şəraitində istiqbalımız və ümidimiz olan uşaqlarımıza daha yaxşı bir gələcək, daha böyük və daha güclü bir Türkiyə buraxmaq üçün bütün gücümüzlə çalışmağa davam edəcəyik.

Axar.az xəbər verir ki, bu sözlər Türkiyə Prezidenti Rəcəb Tayyib Ərdoğanın 23 aprel Milli Suverenlik və Uşaq Bayramı münasibətilə yayımlanan mesajında yer alıb.

“İstiqlal mübarizəmizdə misilsiz bir qəhrəmanlıq dastanı yazan əziz millətimizin iradəsini nümayiş etdirmək yolunda göstərdiyi əzmkarlıq başqa millətlərin də müstəqillik mübarizələrinə ilham mənbəyi olmuşdur. Milli iradənin simvolu TBMM qurulduğu gündən indiyə qədər ötən 98 ildə vətəndaşlarımızın sakit şəkildə, sülh və əmin-amanlıq şəraitində yaşaması, ölkəmizin daha firavan hala gəlməsi üçün ilk günkü həyəcan və qərarlılıqla fəaliyyətini davam etdirir. 16 aprel 2017-ci il tarixində millətimizin təsdiqlədiyi konstitusiya dəyişikliyindən sonra, 24 iyunda keçiriləcək seçkilərlə ölkəmizdəki tərəqqi və inam şəraitini gücləndirəcək yeni bir dövrə qədəm basırıq. Ölkəmizin gələcəyi ilə bağlı qərarların daha güclü şəkildə alına bilməsi və tətbiqini təmin edəcək bu addım, inkişaf və tərəqqimizin də sürətlənməsinə şərait yaradacaqdır.

Qurulmasından bu yana TBMM nəzdində ölkəyə xidmət etmiş bütün millət vəkillərinə, millət adına öz təşəkkürlərimi bildirirəm. İstiqlal hərbinin Baş komandanı, TBMM-in ilk sədri, cümhuriyyətin banisi qazi Mustafa Kamalla birlikdə bütün şəhidləri və qaziləri rəhmətlə yad edir, bütün dünyadakı uşaqların bu müstəsna bayramını ürəkdən təbrik edirəm”, - Ərdoğan bildirib.