ABŞ Prezidenti Donald Trampın Şimali Koreya Lideri Kim Çen İn ilə planlaşdırılan sammiti ləğv etməsi barədə qərarını dəstəkləyirəm.

Axar.az xəbər verir ki, bunu Peterburqda səfərdə olan Yaponiya Baş naziri Şinzo Abe rusiyalı jurnalistlərin suallarını cavablandırarkən bəyan edib.

Baş nazir bildirib ki, o və D.Tramp Şimali Koreyaya münasibətdə siyasətlərini tamamilə bir-biri ilə razılaşdırırlar. Yüksək səviyyəli görüşün baş tutmamasından təəssüfləndiyini qeyd edən Ş.Abe əlavə edib ki, D.Trampın bu barədə qərarına hörmətlə yanaşır.

Baş nazir əlavə edib ki, əsas məsələ ABŞ-Şimali Koreya sammitinin Pxenyanın nüvə-raket proqramlarının ləğvinə, eyni zamanda, oğurlanmış yapon vətəndaşları probleminin həllinə yol açmasıdır.

Ş.Abe vəd edib ki, o, müxtəlif problemlərin həlli üçün ABŞ, Cənubi Koreya, Rusiya, Çin və digər ölkələrin əməkdaşlığına nail olmaq məqsədilə var gücünü sərf edəcək.

Baş nazir bəyan edib ki, Yaponiyaya qayıdan kimi maksimum qısa müddətdə o, D.Tramp ilə telefon danışığına çalışacaq. Ş.Abe qeyd edib ki, sammitin ləğvi məsələsini Prezident Vladimir Putinlə də müzakirə edəcək.

Qeyd edək ki, Tramp ötən gün sammitdən imtina etdiyini desə də, bugünkü açıqlamasında görüşün baş tutmasının mümkünlüyünü dilə gətirib.