Avropa Birliyinin Ermənistanı öz tərkibinə yalnız ölkədə hakimiyyət dəyişikliyi baş verməsinə görə qəbul edəcəyini gözləmək sadəlövhlükdür.

Axar.az xəbər verir ki, bunu “168 Jam” qəzetinə açıqlamasında gürcü ekspert Gela Vasadze deyib.

“Biz bu yolu artıq keçmişik. Uzun zaman keçsə də, Gürcüstan hələ də Avropa kursunu tutduğunu sübut etməlidir. AB-nin Ermənistanı və Gürcüstanı tərkibində görməyi və ya tərəfdaşlıq müqaviləsi imzalamağı arzu etdiyini demək yanlışdı. AB-yə nə Ermənistan, nə də Gürcüstan lazımdır. Bizə isə AB lazımdır. Buna görə də onların standartlarına layiq olduğumuzu sübut etməliyik. İnqilab ölkəni demokratik etmir. Demokratik ölkədə demokratik seçki keçirilir, demokratik institutlar yaradılır. Bu isə hələlik baş verməyib”, – deyə o bildirib.

Qeyd edək ki, bundan öncə Brüsseldəki NATO sammitindən sonra jurnalistlərə açıqlama verən Ermənistan Baş naziri Nikol Paşinyan Avropa Birliyindən narazı olduğunu dilə gətirib. Paşinyan AB-nin İrəvanla bağlı fikrinin dəyişmədiyini və İrəvana lazımi maliyyə yardımları ayırmadığını deyib.