Amerikalı rahib Brunsonun işi ilə bağlı Vaşinqton Ankaraya iqtisadi sanksiyalar tətbiq edə bilməz.

Axar.az xəbər verir ki, bu sözləri türkiyəli jurnalist Ceyhun Bozqurd Sputnik-in Türkiyə bölməsinə açıqlamasında deyib.

“Əgər Vaşinqton sanksiya tətbiq etməyi düşünərsə, Türkiyə müttəfiq deyil, düşmən ölkə olaraq qəbul ediləcək. Çünki ABŞ hər zaman düşmən ölkələrə sanksiya tətbiq edib. Misal olaraq İran, Venesuela...” - deyə jurnalist bildirib.

Bozqurd onu da əlavə edib ki, ABŞ Senatında Türkiyə ilə bağlı təklif edilən qərar sadəcə Türkiyəni yox, bütün türk dünyasını hədəf alır:

“Burada Azərbaycan, Özbəkistan, Qazaxıstan, Tacikistan, Türkmənistan hədəfdədir. Bu ölkələrin Türkiyə ilə ortaq xüsusiyyətləri hansılardır? Bu ölkələr İran və Rusiya ilə normal münasibətlərə malikdir. Yəni ABŞ adminitrasiyası bu ölkələri öz nəzarətinə almağı düşünür. Məhz İran və Rusiyanı sıxışdırmaq üçün... Məsələn, Azərbaycana gəlikdə, Bakı ilə Vaşinqtonun bəzi məsələlərdə qarşı-qarşıya qaldığını görürük”.

Qeyd edək ki, amerikalı rahib Brunsonun uzun zamandır ki, Türkiyədə həbsdə saxlanılmasına qarşılıq olaraq ABŞ Senatında Türkiyənin beynəlxalq fondlardan borc almasını qadağan edən qanun layihəsi təklif edilib.