2018.07.23. 14:39

Rusiya Xarici İşlər naziri Sergey Lavrov və Baş Qərargah rəisi Valeri Gerasimov bu gün İsrailə səfər edəcəklər.

Axar.az xəbər verir ki, bu barədə informasiyanı İsrail baş nazirinin Mətbuat Xidməti yayıb. Onlar Qüds şəhərində İsrail Baş naziri Benyamin Netanyahu ilə görüşəcəklər.

Qeyd edək ki, bundan öncə İsrail Baş naziri Benyamin Netanyahu Moskvaya səfər etmiş və burada Rusiya Prezidenti Vladimir Putinlə görüşmüşdü. Onun görüşünün ardınca İran Ali dini liderinin müşaviri Əli Əkbər Vilayəti Moskvaya gəlmiş və Putinlə görüş keçirmişdi.

Görüşdən sonra jurnalistlərə açıqlama verən Vilayəti İranın Suriyadan çıxmayacağını bildirmiş, İranın Suriyaya müdaxiləsinin İsrailə görə olmadığını demişdi.

***

Qüdsdə Lavrovla Netanyahu arasında görüş baş tutub.

Görüşdə həmçinin İsrail Müdafiə naziri Aviqdor Liberman, İsrail Baş Qərargah rəhbəri Qadi Eisenkot və Rusiya Qərargah rəhbəri Valeri Gerasimov iştirak edib.

Putinin istəyi ilə baş tutan görüşün detalları açıqlanmır.

Lakin İsrail mətbuatında Suriyanın gələcəyi və İranın Suriyadakı varlığının müzakirə olunduğu deyilir.