Valyutada dalğalanma bəhanədir. Biz məsələnin dollar, avro, qızıl olmadığını çox yaxşı bilirik.

Axar.az xəbər verir ki, bu sözləri Türkiyə Prezidenti Rəcəb Tayyib Ərdoğan Rizə şəhərində xalq qarşısında çıxışı zamanı söyləyib. O, ABŞ-ın Türkiyəyə qarşı tətbiq etdiyi sanksiyaların ölkəsini yıxa bilməyəcəyini deyib:

“Bunlar ölkəmizə qarşı başladılan iqtisadi müharibənin güllələridir. Əlbəttə, bunlara qarşılıq vermək üçün lazımi tədbirlər görmüşük, görəcəyik. Amma ən vacibi bu silahları tutan əlləri sındırmaqdır.

Elə hesab edirlər ki, məzənnə dəyişidikcə, Türkiyə yıxılacaq, diz çökəcək, bizə fərqli hüquq tətbiq edən kimi bu ölkə təslim olacaq. Bizimlə mübarizə üçün belə üsullardan istifadə edənlər unutmasın ki, dünyada ölkəmizə qarşı siyasət yürüdərək, uğur qazanan heç bir siyasətçi, idarəçilik yoxdur. Bu millətin ahını alan hər kəs gec-tez bəlasını tapacaq”.