Rusiya Prezidenti Vladimir Putin Yaponiya Baş naziri Şinzo Abeyə heç bir ilkin şərt olmadan sülh müqaviləsi imzalamağı təklif edib.

Axar.az xəbər verir ki, Putin təklifini Şərq İqtisadiyyat Forumu çərçivəsində Abeylə baş tutan görüşü zamanı səsləndirib.

“Ağlıma bir fikir gəlib. Gəlin sülh müqaviləsi bağlayaq, amma təbii ki, indi yox. İlin sonuna qədər müqaviləni heç bir ilkin şərt olmadan imzalayaq. Bu müqavilənin əsasında dövlətlər öz aralarındakı mübahisəli məsələləri həll etməyə davam edəcəklər”, – deyə o bildirib.

Qeyd edək ki, İkinci Dünya müharibəsindən sonra Yaponiya ilə SSRİ arasında heç bir sülh müqaviləsi imzalanmayıb. Müqavilənin imzalanması üçün Yaponiya 4 adanın ona qaytarılmasını tələb edir. Moskva 70 ildən çoxdur bu şərti qəbul etmir və Cənubi Kuril adaları üzərində Rusiyanın suverenliyinin şübhəsiz olduğunu iddia edir.

Putin bu görüşdə İkinci Dünya müharibəsindən buvaxtacan müzakirələrin getdiyini, Moskvanın hər iki xalqı qane edəcək həll üçün çalışdığını bildirmişdi.