Ermənistanın yüksəkçinli məmurlarının şəxsi danışıqlarının yayımlanması baş nazirə qarşı yaranan etirazın göstəricisidir.

Axar.az xəbər verir ki, bunu “Sobesednik.ru” saytına açıqlamasında politoloq Arkadi Dubnov deyib. Onun sözlərinə görə, məmurların danışığının yayımlanması göstərir ki, Paşinyanın düşmənləri var və onlar baş nazirin hakimiyyətini legitim hesab etmirlər:

“Postsovet Ermənistanının tarixində iki qanlı toqquşma olub. Bunlardan biri 1999-cu il parlament teraktı, ikincisi 2008-ci il hadisələridir. 2008-ci il mitinqlərinin təşkilatçılarından biri Nikol Paşinyan idi. O, buna görə həbsdə yatıb və amnistiya ilə həbsdən çıxıb. Müxalifət hər zaman bu hadisəni hökumətin cinayəti hesab edib. Bu hadisə ermənilərin yaddaşında hökumətin ən ali ədalətsizliklərindən biri kimi qalıb və Paşinyanın əsas istifadə etdiyi ittihamlardan biri olub. Məhz bu ittihamlar onu hakimiyyətə gətirib. Ona görə də Paşinyanın bu ittihamları məhkəmə vasitəsilə reallaşdırması şərəf məsələsi idi. O, məhz bunu etdi. Məmurların telefon danışığının yayılması göstərdi ki, əslində Paşinyanın nümayiş etdirdiyi məhkəmə sistemi heç də müstəqil deyil”.

O, indiki geosiyasi və iqtisadi şəraitdə Ermənistanın Rusiyadan uzaqlaşmaması gərəkdiyini deyib.