Türkiyənin Xarici İşlər naziri Mövlud Çavuşoğlu səudiyyəli jurnalist Camal Qaşıqçı hadisəsi ilə bağlı Səudiyyə Ərəbistanının İstanbuldakı baş konsulunu sərt tənqid edib.

Axar.az xəbər verir ki, bu barədə türk nazir ABŞ Dövlət katibi Mayk Pompeo ilə görüşdən sonra açıqlamasında bildirib.

“Bu gün konsulun iqamətgahında axtarış aparılacaq. Baş konsul ölkəsinə gedə bilər, nə vaxt gəlib-gələcəyi də mənim işim deyil. Buna səudiyyəli rəsmilər qərar verir. Ancaq baş konsul bəzi davranışları ilə sanki insanları lağa qoyub. Rəfləri açıb göstərməsi kəskin reaksiyalara səbəb olub. Baş konsulun maşınında və malikanəsində axtarış aparılacaq”, - Çavuşoğlu qeyd edib.

Qeyd edək ki, 10 gün öncə Səudiyyənin İstanbuldakı baş konsulu Məhəmməd əl-Uteybi “Röyter” agentliyinin əməkdaşlarına konsulluq binasında çəkiliş aparmağa imkan vermiş və 6 mərtəbəli binanı otaq-otaq gəzərək, jurnalist Camal Qaşıqçının orda olmadığını göstərmək üçün rəfləri açıb göstərmişdi.