Fransız tarixçi Eduar Yusson I Dünya müharibəsinin başa çatmasının 100 illiyi ərəfəsində Fransa Prezidenti Emmanuel Makronun Rusiyanı “düşmən” elan edən bəyanatına kəskin reaksiya verib.

Axar.az xəbər verir ki, bu barədə tarixçi “Atlantiko” nəşrində məqalə yazıb.

Tarixçinin sözlərinə görə, I Dünya müharibəsinin ən qanlı döyüşlərindən birinin yaşandığı Verden şəhərində olarkən Makron Rusiya, Çin və ABŞ-a qarşı mübarizə aparmaq üçün “əsl Avropa ordusu” yaradılması barədə fikirlər səsləndirib. Eyni zamanda, fransız hökuməti də bu tarixə aid bütün hadisələrin sülh mövzusuna həsr ediləcəyini qeyd edib.

Yussonun fikrincə, Rusiyanın düşmən elan edilməsi üçün yer və məkan seçimi böyük heyrət doğurub. Bundan əlavə, bir neçə gün sonra Rusiya Prezidenti Vladimir Putinin də Parisə səfəri nəzərdə tutulub.

“Müasir Rusiyaya qarşı iradlar nə olursa olsun, dünya onları birləşdirən dəyərləri xatırlamalıdır. Rusiya ordusu 1914-cu ilin payızında göstərdiyi qəhrəmanlığa və böyük itkilərinə görə hörmətə layiqdir. Bunlar olmasa, bəlkə də Almaniyanı məğlub etmək mümkün olmayacaqdı. Öldürülən 1.8 milyon rus əsgərini yad etməyin vaxtı gəlməyib? Siyasəti bir kənara qoyub XX əsrdə iki dəfə dünyanı xilas etmiş xalq və ölkə barədə xatırlamaq lazımdır”, - tarixçi bildirib.

Tarixçi Rusiyanın “Avropanın azadlığının müdafiəsi” uğrunda Birinci Dünya müharibəsi zamanı 5, ikinci dünya müharibəsi zamanı isə 27 milyondan artıq itki verdiyini xatırladıb.

“SSRİ-nin süqutundan sonra heç bir alman kansler Rusiyaya qarşı bir dəfə də olsun, sülh naminə bir addım atmayıb, ancaq Fransa və Almaniya belə fikirləri bir-birinə qarşı müxtəlif tədbirlər çərçivəsində dəfələrlə səsləndiriblər”, - tarixçi fikrini tamamlayıb.

Qeyd edək ki, Fransa Prezidenti Emmanuel Makron ABŞ-dan müstəqil olan Avropa ordusunu yaratmağı təklif edib. Onun sözlərinə görə, bu orda Rusiya aqressiyasına da cavab olmalıdır.