İsrail ordusu ilə yaşanan son qarşıdurma zamanı HƏMAS yeni raket texnologiyasını nümayiş etdirib. Yeni yaradılan və adı açıqlanmayan raket sistemləri ilə bazar günündən etibarən HƏMAS İsrail mövqelərinə 460 raket zərbəsi endirib. İsrailin Dəmir Qübbə müdafiə sistemləri bu raketlərin böyük əksəriyyətinin qarşısını ala bilməyib.

İsrail ordusu da faktı təsdiq edib. Ordudan verilən açıqlamada Dəmir Qübbə müdafiə sistemlərinin buraxılan 460 raketdən yalnız 100-nün qarşısını ala bildiyi ifadə edilib.

Axar.az xəbər verir ki, İsrail ordusunun sözçüsü Conatan Konrikus fələstinlilərin raket texnologiyasını yenilədiyini, son qarşıdurmalar zamanı isə rus istehsalı tank əleyhinə raket sistemlərindən istifadə edildiyini açıqlayıb.

HƏMAS-a yaxın mənbələr də bu iddianı qismən təsdiqləyib. Mənbələr raketlərin yeniləndiyini, ancaq yeni sistemlə bağlı məlumat verə bilməyəcəklərini qeyd ediblər.

Müdafiə sisteminin yarılması yəhudilərin kəskin narazılığına səbəb olub. Qəzza yaxınlığındakı yəhudi əhali İsrail hökumətinə qarşı etiraz edib. HƏMAS-ın yeni raketlər vasitəsilə uğur qazanmasında İsrail hökumətini lazımı tədbirlər görməməkdə ittiham edən yəhudilər etirazlar və hökumət əleyhinə şüarlar səsləndirərək, aksiyalar zamanı avtomobil şinləri yandırıblar.

HƏMAS-ın raket hücumlarına görə yüzlərlə yəhudi riskli bölgələri tərk edib. Evlərini tərk edən yəhudilər hökumətin atəşkəs bağlamasının utancverici olduğunu bildiriblər.

Yaşanan son qarşıdurmada təhlükəsizlik sahəsindəki boşluqları fəlakət adlandıran İsrail müxalifəti isə Netanyahu və Likud Partiyasının HƏMAS-a təslim olduğunu söyləyiblər.