Türkmənistanda peyk antenaları satışdan yoxa çıxıb.

Axar.az xəbər verir ki, bu barədə məlumatı “Azadlıq" radiosu yayıb.

“Peyk antenaları daha çox Aşqabadın Gülüstan, Summar, Altın Asır Gündoğar bazarlarında satışa çıxarılırdı. İndi bu antenalar satılmır. İddialara görə, bu antenaların satışı qadağan edilib. Belə ki, ticarətlə məşğul olanlara bu qadağa şifahi formada çatdırılıb və onlara əməl etməyəcəkləri təqdirdə ticarət hüquqlarının ləğv olunacağı bildirilib”, – deyə radionun müxbiri bildirib.

Türkmənistanda peyk antenaları 1990-cı illərdən bu yana yayılıb. Yerli əhali peyk antenaları vasitəsilə daha çox Rusiya və Türkiyə kanallarına baxır. Sərhəd bölgələrində isə daha çox özbək, qazax və Azərbaycan televiziyaları məşhurdur.

Ölkədə peyk antenalarının qadağası 2015-ci ildən başlayıb. Buna səbəb kimi mərkəzləşdirilmiş kabel televiziyasına keçid göstərilib. Kabel televiziyasının dəyərinin son 8 ildə 5 dəfə artması insanların yenidən peyk antenalarına müraciət etməsiylə nəticələnib.