Türkiyə Xarici İşlər Nazirliyi PKK-nı maliyyələşdirməsi səbəbi ilə mühakimə olunan 10 şübhəlinin bəraət qazanmasına Danimarka hökumətindən izahat tələb edib.

Axar.az xəbər verir ki, nazirlik verdiyi açıqlamasında Kopenhagen polisinin istintaqı nəticəsində həbs olunan PKK yardımçılarının Danimarka məhkəməsi tərəfindən "günahsız olduqları və PKK terror təşkilatına pul köməyi etdiklərini isbat edəcək kifayət qədər dəlilin olmadığı" səbəbi ilə azad etdiyini bildirib:

"Terrorizmin maliyyələşdirilməsi ilə mübarizə hər bir ölkə kimi, Danimarka üçün də beynəlxalq öhdəlikdir. Biz Danimarkanın atdığı bu addıma görə izahat tələb edirik. PKK terror təşkilatının maliyyə qaynaqları ilə mübarizədə alınan tədbirlər kontekstində Danimarka məhkəməsinin çıxardığı bu qərar ölkəmiz tərəfindən qəbuledilməzdir".