AST Şirkətlər Qrupunun rəhbəri Telman İsmayılov Rusiya bazarına yenidən qayıtmağa çalışır.

Axar.az xəbər verir ki, İsrail mətbuatı buna işarə kimi bir müddət öncə Azərbaycan əsilli yəhudi milyarderin Rusiya Prezidenti Vladimir Putinin köməkçisi Vladimir Kojinlə görüşünü göstərib.

Belə ki, İsmayılov Rusiya şou-biznesinin əsas aparıcı şəxslərində olan Aleksandr Dostmanın ad günündə Kojinlə qarşı-qarşıya gəlib. Bütün tədbir boyunca bir yerdə olan hər iki şəxsin arasında səmimi söhbət baş tutub. Maraqlı məqam isə odur ki, ad gününü işıqlandıran jurnalistlər İsmayılovla Kojinin əsasən rublun ucuzlaşması, Rusiyanın investisiyalara ehtiyacı olması barədə danışdıqlarını söyləyiblər.

Qeyd edək ki, Telman İsmayılova Rusiyada ən ağır zərbə 2009-cu ildə Putin tərəfindən vurulmuşdu. Belə ki, milyarderin əsas gəlir mənbəyi hesab edilən Çerkizov bazarı Moskvanın istəyinə uyğun olaraq qapadılmışdı. Bundan sonra əsas biznesini Türkiyəyə köçürən İsmayılov uzun illərdir ki, Rusiyaya geri dönməyə çalışır. Ekspertlər isə onun Putinin hərbi-texniki əməkdaşlıq və Rusiya prezidentinin işlərinin idarə edilməsi üzrə köməkçisi Vladimir Kojinlə görüşməsinin də məhz hazırda yaranmış boşluqdan istifadə edərək geriyə qayıtmasına yardımçı olmasını istəməkdən ibarət olduğunu deyirlər.