Gürcüstan NATO və Avropa Birliyindən imtina etsə belə, Rusiya onun ərazi bütövlüyünü bərpa etməyəcək.

Axar.az xəbər verir ki, bunu jurnalistlərə açıqlamasında Gürcüstanın Uzlaşma və Mülki Bərabərlik naziri Paata Zakareişvili söyləyib. Onun sözlərinə görə, Gürcüstanda belə fikir Şevardnadze dövründə mövcud olub:

"Eduard Şevardnadze müharibədən sonra MDB-yə girməyi və Abxaziya ilə problemləri həll etməyi təklif etdi. Ancaq biz gördük ki, hər şey tamam fərqli oldu. NATO-nun hazırkı üzvlərindən hansısa biri alyansa daxil olan zaman MDB kimi hərbi təzyiqlərlə qarşılaşmayıb. Mən təkcə Gürcüstan-Rusiya konfliktindən danışmıram. Misal kimi Ukraynanı göstərə bilərik. Üstəlik, Azərbaycanla Ermənistan da MDB üzvləridir. Biz Rusiya ilə problemlərimizi elə həll etməliyik ki, NATO və Avropa Birliyinə girən zaman heç bir problemlə üzləşməyək".