Rusiya Donbası Ukraynaya geri qaytara bilər.

Axar.az xəbər verir ki, bu sözlər İsveç politoloqu Anders Aslundun Ukrayna mətbuatında dərc olunan köşə yazısında yer alıb. Onun sözlərinə görə, Boris Qrızlovun Ukrayna üzrə rəsmi nümayəndə təyin edilməsi artıq bu prosesin başladığını göstərir:

"Dekabrın 26-də Putin özünün ən yaxın adamlarından biri olan Boris Qrızlovu Rusiyanın Ukrayna ilə üçtərəfli əlaqə qrupunun nümayəndəsi təyin etdi. Bu təyinat Rusiyanın Ukraynaya qarşı siyasətində vacib dəyişikliyə səbəb ola bilər. Qrızlov Putinin yaxın dairəsindəkı ağır toplardan biridir. Bundan başqa, o, Təhlükəsizlik Şurasının daimi üzvü, keçmiş Daxili İşlər naziri, Dumanın spikeri və Putinin Peturburqdakı Dövlət Təhlükəsizlik Komitəsindəki keçmiş həmkarıdır. Qrızlov bu vəzifədə nisbətən "yüngül çəkili" olan Azamat Qulməhəmmədovu əvəz edəcək. Sonuncu bu posta aprel ayında təyin olunub. Onun təyin olunmasında məqsəd Rusiyanın danışıqlarda rolunu azaldaraq, Ukraynanı Donetsk və Luqank liderləri ilə danışıqlara məcbur etmək idi. İndi isə Kreml nəzarəti öz əlinə götürüb. Bu il separatçıların üç ağıllı komandiri (Pavel Dremov, Aleksey Mozqovoy və Aleksey Bednov) kifayət qədər peşəkar formada öldürülüblər. Bəzi ekspertlər bu işin arxasında rus hərbi kəşfiyyatının dayandığını güman edirlər. Bunun ardınca isə yayda bəlli oldu ki, Donetsk və Luqansk döyüşçüləri birbaşa Rusiya Müdafiə Nazirliyinə tabe olurlar. 2014-cü ilin avqustunda isə Donetsk və Luqanskda siyasi liderlər dəyişdirildi. Aleksandr Zaxarçenko Aleksandr Borodayın yerinə "Donetsk Xalq Respublikası"nın baş naziri vəzifəsinə gətirildi, "Luqansk Xalq Respublikası"na isə İqor Plotnitski rəhbərlik etdi. Onların təyinatı Ukraynanın 8 vilayətinin Rusiyaya birləşdirilməsini nəzərdə tutan Novorossiya layihəsinə bağlanması anlamına gəldi. Əslində təyin olunan hər iki liderin həm imkanları azdır, həm də ki, Moskvanın əmrlərinə tam bağlıdırlar".