Suriya Müvəqqəti Hökumətinin Səhiyyə naziri Məhəmməd Vəcih Cuma Rusiya və ABŞ-ın PYD-yə silah verilməsi mövzusunda razılığa gəldiyini iddia edib.

Axar.az Anadolu agentliyinə istinadən xəbər verir ki, Cuma PYD-nin Suriyada uğur qazanmayacağını deyib:

"Hər iki tərəf PYD-ni gücləndirir. Amma uğur qazana bilməyəcəklər. Çünki biz min ildən çoxdur ki, Suriyadayıq. Heç kim türkmanları Suriyadan təmizləyə bilməyəcək".

PYD-nin Tel Abyad bölgəsindəki minlərlə türkmanı köçürdüyünü deyən Cuma kürdlərin ölkənin şimalında dövlət qurmaq istədiyini bildirib:

"İşin maraqlı tərəfi odur ki, Suriyada ərəblərdən sonra ikinci böyük xalq bizik. Suriyada yaşayan 3,5 milyon türkman Cenevrə danışıqlarında təmsil olunmur. Burada kürdlərin sayı 1,5 milyondur. Amma onların Cenevrədə iştirakı dəstəklənir. Buna baxmayaraq, mübarizəmizi davam etdirəcəyik".