Satışda olan bəzi dondurmaların tərkibində insanların həyat və sağlamlığı üçün təhlükə yaradan mikroorqanizmlər aşkar edilib.

İqtisadiyyat Nazirliyindən Axar.az-a verilən məlumata görə, nazirlik müxtəlif ticarət obyektlərində satışda olan dondurmalara baxış keçirib. Götürülən nümunələrin müayinəsindən sonra bəzi dondurmalarda bağırsaq çöpləri qrupundan olan bakteriyaların (koliformlar) miqdarının normativ sənədlərdə nəzərdə tutulmuş miqdardan artıq olduğu müəyyən edilib.

Bu dondurmalar aşağıdakılardır:

“Çudo” şokoladlı, AER plombir şokoladlı, AER plombir vanilli, “Yasif” plombir və “Melisa”, “Nostalji” plombir, “Briket-krem brule”, “Bakinskiy privet” plombir, "Meqapolis" şokoladlı plombir, "Cappuçino" qəhvəyi, "Matryoşka" plombir, "Selena" şokoladlı plombir, "Panda" südlü, "Meçta" şokoladlı plombir, "Arktika" şokoladlı plombir, "Tanqo" şokoladlı və "Tanqo" cemli, "Mono Quality" badamlı, "Bakı gecələri" plombir, "Armada", "Eskimo Yoloçka", "Yeni şəhər" plombir, "İçəri şəhər" qəhvəyi, "İçəri şəhər" qəhvəli, "Pristij" çiyələkli, "Pristij" qozlu, "Əsl" plombir, "Südlü" klassik və "A-klass".

Aşkar olunmuş qanun pozuntuları ilə əlaqədar həmin dondurmaların istehsal edildiyi AER Company Qrup MMC, Band Milk MMC, S.A.B.A. Şirkəti MMC, A.Y.S-60 MMC, habelə fərdi sahibkarlar Müzəffər Poladov və Səringül Yusubova dondurmaların istehsalının dayandırılması ilə bağlı xəbərdarlıq edilib və məhdudlaşdırıcı tədbirlər görülüb.