"Arif Əmrahoğlunun səhhəti təxminən on gündür ki, pisləşib. Hazırda Milli Onkologiya Mərkəzində müalicə olunur".

Bu sözləri Axar.az-a Yazıçılar Birliyinin katibi, ədəbiyyatşünas-tənqidçi Arif Əmrahoğlunun həyat yoldaşı onun səhhəti ilə bağlı danışarkən dedi. Onun sözlərinə görə, hazırda A.Əmrahoğlunun vəziyyəti nisbətən normaldır:

"Həkimlərin dediyinə görə, vəziyyəti getdikcə yaxşılaşır. Durumu stabildir, çox şükür. Hazırda sistem altındadır deyə, danışmaq imkanı yoxdur".

A.Əmrahoğlunun həyat yoldaşının sözlərinə görə, hələ ki, bir müddət müalicəsi davam edəcək:

"Mədəsində yaranmış problemlə bağlı müalicə alır. Müalicə Milli Onkologiya Mərkəzində aparılır. Tez-tez dostları, yoldaşları gəlir yanına. Ad çəkmək istəmirəm. Kimlərisə deyərəm, kimsə yadımdan çıxa bilər. Ancaq sağ olsunlar, bizi tək qoymurlar".

Xatırladaq ki, Arif Əmrahoğlu 1954-cü il oktyabrın 28-də Gürcüstanın Marneuli rayonunun Ağqula kəndində anadan olub. O, hazırda Azərbaycan Yazıçılar Birliyinin katibidir. Ədəbiyyatşünas, tənqidçi, tərcüməçi, filologiya elmləri namizədi olan tatnınmış ziyalı A.Əmrahoğlu Azərbaycan Universitetində və Bakı Dövlət Universitetində dərs deyir.

Allah şəfa versin!