ANS telekanalının əməkdaşı Afət Telmanqızı bir müddət əvvəl
prezident İlham Əliyevə müraciət ünvanlamışdı. O qeyd etmişdi ki,
gəlinləri Pərvinə Hüseynova Sumqayıtdakı 1 saylı doğum evinin
həkimlərinin məsuliyyətsizliyi ucbatından vəfat edib:
"Xəstəxananın həkimləri oktyabrın 4-ü heç bir tibbi göstəriş
olmadan səbəbsiz yerə xəstə üzərində qeysər əməliyyatı həyata
keçiriblər. Əməliyyatdan sonra xəstənin vəziyyəti ağırlaşıb.
Xəstəni ağır vəziyyətdə Bakıya Mirqasımov adına Respublika
Xəstəxanasına gətirdik. Burda müayinə zamanı bizə dedilər ki,
əməliyyat zamanı xəstə çoxlu qan itirib. Xəstənin bədənində cift
qalığı qalıb və bu da bədəndə zəhərlənmənin yaranmasına səbəb olub.
Bu xəstəxanada da həkimlər xəstəmizin həyatını xilas edə
bilmədilər. Xəstə üzərində vaxtında tibbi müayinə aparmadılar.
Xahiş edirəm bu işi nəzarətinizə götürəsiniz. Bir ananın ölümünə
səbəb olanlar, bir körpəni anasız qoyanlar cəzalandırılsın, həkim
adından məhrum edilsin".
Noyabrın 22-də "Media forum" saytına danışan Afət Telmanqızı deyib
ki, iş nəzarətdədir:
"Araşdırmanı Yasamal Rayon Prokurorluğu aparır. Baş prokuror Zakir
Qaralov prosesi nəzarətə götürüb. Noyabrın 20-də Sumqayıt şəhər 1
saylı doğum evinin həkimi Vidadi Həsənovun və iki ginekoloqun
izahatı alınıb. Doğum evinin baş həkimi İmmi Ələkbərova, əməliyyatı
aparan həkim Sevda Xanbutayeva, şöbə müdiri Məmməd Əsgərov və
anestezioloq da gəlib ifadə verməlidir. Səhiyyə Nazirliyi isə
donmuş vəziyyətdədir. Guya doğuşa yardım komissiyası işi araşdırır.
Az qalıb gəlinin qırxı çıxa, amma ortalıqda bir açıqlama
yoxdur".