Ukraynada 2015-ci ildə baş verən epidemiya təkrarlanır. Bu ildən başlayaraq ölkədə yayılan və artmaqda olan qızılca xəstəliyi artıq bir uşağın ölümünə səbəb olub. Yeni ildən etibarən Ukraynada növbəti dəfə qızılca xəstəliyi yayılıb. Xəstəlik ölkənin əsasən böyük şəhərlərində geniş yayılıb.

Axar.az xəbər verir ki, Azərbaycan Elmi Tədqiqat Pediatriya İnstitutunun direktoru, Səhiyyə Nazirliyinin baş pediatrı Nəsib Quliyev yayılan bu tip xəstəliklərlə bağlı açıqlamasında Azərbaycanda əhalinin peyvəndə cəlb olunmasının 95-98 faiz arasında olduğunu bildirib.

N.Quliyev məhz bunun nəticəsində son 10 ildə Azərbaycanda heç bir yoluxucu xəstəliyin epidemiyası halının qeydə alınmadığını deyib:

“Peyvəndlərin vurulması vacibdir. Dünya tarixində indiyə qədər peyvəndə alternativ heç nə kəşf olunmayıb. Hər il məhz peyvəndin köməyi ilə 3 milyon uşağın həyatı ölümdən xilas edilir”.