Bu cür əməliyyatlarda venalar proses boyu iflic durumunda olur, venaların hərəkəti bir növ dayanır. Ayaqda hərəkət olmadığı üçün qan durğunluğu yaranır və bu da tromblaşmaya meyilliliyi artırır. Ancaq əməliyyatdan sonra xırda molekulyar separinlərin vurulması, ayağa müxtəlif masajedici aparatların qoşulması, erkən xəstənin aktivləşdirilməsi tromblaşma ehtimalını azalda bilərdi.

Bu sözləri Axar.az-a tibb eksperti Adil Qeybulla Bakı şəhəri 25 saylı şəhər poliklinikasının həkim-otorinqoloqu Əziz Bayramlının “MediStyle Hospital"da bud-canağ oynağının endoprotezləşmə əməliyyatı keçirdikdən 4 gün sonra dünyasını dəyişmə səbəbindən danışarkən deyib.

A.Qeybulla qeyd edib ki, bu cür əməliyyatlarda troblaşma ehtimalı yüksəkdir. Hətta onun qarşısının alınması üçün qabaqlayıcı tədbirlər görülsə belə, tromblaşma ehtimalı həmişə var:

“Venalar əməliyyat boyu iflic durumunda olur. Çünki əməliyyat zamanı vurulan relaksatlar əzələləri iflic edir və demək olar ki, venaların hərəkəti bir növ dayanır. Ayaq hərəkətsiz qaldığı üçün qan durğunluğu yaranır. Bütün bunlar hamısı tromblaşmaya meyilliliyi artırır. Əgər əməliyyat olunan insanın yaşı çoxdursa, bu, tromblaşma ehtimalını daha da artırır. Qan-damar sistemində problemi, şəkərli diabet xəstəliyi olan insanlarda bu ehtimallar daha yüksəkdir. Ancaq əməliyyat edilməsi həmişə mümkündür. Sadəcə əməliyyat sonrası xırda molekulyar separinlər vurulmalı, ayağa müxtəlif masajedici aparatlar qoşulmalıdır. Bütün bunlar tromblaşmanın qarşısını alır. Görülən tədbirlər nəticə verməyə bilər. Ancaq təbii ki, biz bütün bu tədbirlərin görülüb-görülmədiyini bilmədiyimiz üçün bir söz deyə bilmərik”.

A.Qeybulla bildirib ki, tromb ağciyər arteriyasında olur. Çünki venoz tromblar yalnız ağ ciyər arteriyasında tromblaşma yarada bilər, onlar beyinə gedə bilməz:

“Yalnız arterial sol mədəcikdə yaranan tromblar beyinə gedə bilər. O da revmatizmdə, ürəkdə endokarbitlərdə, sol mədəcikdə əmələ gələn tromblar yarada bilər. Hər halda patoloji-anatomik diaqnoz olmalıdır. Yalnız bundan sonra demək olar ki, burada nə baş verib”.

A.Qeybullanın sözlərinə görə, əgər həkim xəstənin yaşına uyğun lazımi tədbirləri görübsə, o zaman burada ölümün həkim qüsuru üzündən baş verməsindən söhbət gedə bilməz:

“Bütün bunlar araşdırılır, əlbəttə. Əməliyyat olunan xəstə ilə bağlı müəyyən protokollar var. Xəstənin yaşı, çəkisi, başqa xəstəliklərinin olması və s. faktorları nəzərə alaraq, tromblaşmaya qarşı müxtəlif tədbirlər görülür. Sözügedən tədbirlərin hamısı görülübsə, amma xəstə vəfat edibsə, bu artıq tale məsələsidir”.

Qeyd edək ki, Bakı şəhəri 25 saylı şəhər poliklinikasının həkim-otorinqoloqu Əziz Bayramlı aprel ayının 14-də “MediStyle Hospital"da bud-canağ oynağının endoprotezləşmə əməliyyatı keçirib. 63 yaşlı Ə.Bayramlı əməliyyatdan 4 gün sonra komaya düşüb və yerləşdirildiyi Ə.D.Məlikov adına 6 saylı Birləşmiş Şəhər Xəstəxanasında dünyasını dəyişib.

Əməliyyatı həyata keçirən həkim Ayaz Hümbətov və 6 saylı Birləşmiş Şəhər Xəstəxanasının məlumatına görə, Ə.Bayramlıya beyin ocağında işemik insult diaqnozu qoyulub. Beyində tromblaşma müşahidə edilib.